Hər birimiz yeni ilə yeni ümidlər, gözləntilər, arzular, qərarlar və hədəflərlə başlayırıq. Ən maraqlı Yeni il ənənələri də elə bu gözləntilərə uyğun formalaşır. Bununla da hər mədəniyyət eyni bayram sevincini paylaşsalar da bir-birindən adət-ənənələriylə fərqlənirlər. Həmin adətlərin çoxunun qədim tarixi olsa da, yeni yaranan adətlər də az deyil.
Övladlarınızla birgə əyləndiyiniz bu bayramda fərqli adət-ənənələrlə tanış olaraq onların dünyagörüşünü zənginləşdirə, yeni məlumatlar əldə etmələrinə kömək edə bilərsiniz:
ÇİN: Çinlilər xoşbəxtlik və uğur rəmzi olaraq Yeni il zamanı qapılarını qırmızı rəngə boyayırlar. Bayrama başlamazdan əvvəl ötən ilin ağırlığını aradan qaldırmaq üçün evlərini yaxşıca təmizləyirlər. Uğur və bolluq gətirmək üçün evlərinə müxtəlif çiçəklər, bitkilər alır və uğur gətirdiyinə inanılan qırmızı zərflərdə uşaqlara pul hədiyyə edirlər. İllərdir məhsuldarlığın simvolu hesab etdikləri naringini də bir-birlərinə hədiyyə edirlər.
Belçika: “Yeni il məktubları” Belçikada uşaqların ən çox sevdiyi yeni il adətlərindən biridir. Belə ki, uşaqlar məktəbdə yazdıqları xüsusi məktubları birgə bəzəyir, yeni il gecəsi də həmin məktubları ailələrinə oxuyurlar. Bu da uşaqların hiss və duyğularını, istəkləri, yeni ildən gözləntilərini səsləndirdikləri mühiti yaradır.
Rumıniya: Yeni il adət-ənənələri siyahısında heyvansevər adətlərdən biri Rumıniyadadır. Rumıniyalı fermerlər Yeni il ərəfəsində heyvanları ilə ünsiyyət quraraq, qarşılığında nəsə alacaqlarını gözləyərək yeni ilə hazırlaşırlar. Onlar heyvanlarla ünsiyyət qura bilən ailələrin ən gözəl ili yaşadıqlarına inanırlar. Bununla da övladlarının da gələcəklərinin uğurlu olacağına inanan rumıniyalılar hər il bu ənənəni davam etdirir.
Yunanıstan: Yunanıstanda Yeni il ərəfəsində ailələr bir yerə toplaşaraq yeni il tortu olan “Vasilopita” hazırlayırlar. Bu tortun xüsusiyyəti içərisindəki gizlənən qızıl sikkə olur. Tortu ailənin ən kiçik üzvü kəsir. İnanılır ki, həmin qızıl sikkə kimin dilimində düşsə, həmin il onun üçün uğurlu olacaq.
Estoniya: Estoniyada Yeni il gecəsi uşaqlarla gənclər bir araya gəlib şamlardan və ağac budaqlarından istifadə edərək böyük tonqal yandırırlar. Tonqalı yandıranların saflığını simvolizə edən bu alovun yeni ildə rifah və bolluq gətirəcəyinə inanılır.
Rusiya: Uşaqlar ailələriylə birgə öz diləklərini məktuba yazırlar. Adətən şam ağacına yerləşdirilən məktubları Yeni İl gecəsi valideynlər yandırırlar. Bununla da həmin diləklərin gerçəkləşəcəyi düşünürlər.
Bir daha “Bağçam” Uşaq Bağçaları adından yeni ilin hər kəs üçün daha uğurlu, xoşbəxt və sevgi dolu il olmasını diləyirik. Yeni İliniz mübarək!