Əksər valideynlər “Uşaqları ilə birgə yatmalıdılarmı?” sualı ilə qarşı-qarşıya qalırlar. Bir yaşa qədər bu normal sayılsa da, bir yaşdan sonra valideynlərə problemlər yaradır. Bu zaman körpənin ata və anası onu ayrı yatızdırmaq üçün müxtəlif yollardan istifadə edirlər.
Bagcam.az sizə bunun üçün faydalı metodlar təqdim edir.
Körpəni qucaqda saxlamaq, onunla birlikdə uzanmaq olar, lakin yüngül yuxu fazasında onu mütləq öz çarpayısına qoymaq lazımdır. Bu zaman bir müddət onun yanında durmaq, əlini onun üzərinə qoymaq, dərin yuxuya gedənədək gözləmək olar. Bu müddət ərzində çevrilə, gözlərini aça və əmin ol bilər ki, onun hər şeyi yanındadır. Bu zaman ana yavaş-yavaş əlini çəkə bilər.
Körpə niyə ayılır? Çünki sərinlik və anasının yanında olmadığını, yanındakı mühitdə boşluq, təhlükə hiss edir.
Körpə üçün çox vacibdir ki, onun otağı rahat və isti olsun. Bunun üçün yatmazdan əvvəl onun yerini ütü ilə qızdırmaq olar. Körpənin özünü rahat hiss etməsi üçün ona çox sevdiyi oyuncağı da vermək olar. Bu elə oyuncaq olmalıdır ki, onu əldə saxlamaq rahat olsun.
Uşaq təmasa çox ehtiyac duyur- sığallamaq, ayaqlarına və əllərinə toxunmaq və s. Bir çox uşaqlar analarının əlindən tutanda daha tez yuxuya gedirlər. Uşağı yerinə qoyduqdan sonra yanından ayrılmaq olmaz. Yanında qalmaq, ona ana qayğısını hiss elətdirmək lazımdır.
Uşağı ana südündən tədricən ayıran analar uşağı yatızdırarkən yanına öz əşyalarını qoysalar daha yaxşı olar. Bu körpəyə anasının yanında olduğu hissini yaşadacaq.
Mənbə: uduba.com