Gəlişi ilə daha çox uşaqları sevindirən bayramlardan biri də Novruzdur. Bu bayramda həyata keçirilən maraqlı adətlər uşaqların sevincinə səbəb olur. Məhz buna görə hər zaman balacaları əyləndirməyə, onların dünya görüşünü artırmağa çalışan uşaq bağçası valideynlərin iştirakı ilə martın 19-u Novruz şənliyi təşkil edib.
Novruzun sevimli qəhrəmanları olan Keçəl, Kosa və Bahar qızını balacalar böyük məharətlə canlandıraraq müxtəlif səhnəciklər göstərdilər. Eyni zamanda uşaqlar rəqs bacarıqlarını da nümayiş etdirdilər. Novruzun maraqlı adətlərindən olan papaq atmaq və yumurta döyüşdürmək uşaqların bayram əhvalını daha da artırdı. Hər qrup müəlliməsi ilə birgə hazırladığı maraqlı xonçaları nümayiş etdirərək yarış keçirtdilər. Ən yaxşı xonçanı seçmək isə valideynlərə həvalə olundu. Birinciliyi “Zayçik” qrupunun xonçası qazandı. Şənlikdən sonra valideynlər xoş təəssüratlarını bölüşdülər.