May ayının 30-da Rus Dram teatrında məktəbəqədər təhsil müəssisələri arasında II Teatr Festivalı keçirələcək. Budəfəki festivalda balacalar Antuan de Sant Ekzüperinin “Balaca Şahzadə” əsəri əsasında qurulmuş tamaşanı səhnələşdirəcək. Tamaşanın quruluşçu rejissoru Rafiz Mehdizadə və Əli Əlizadədir.
Rafiz Mehdizadə Bagcam.az-a tamaşa haqqında müsahibə verib. O bildirib ki, tamaşada 128 bağça yaşlı uşaq iştirak edəcək:
“Tamaşada üç əsas obraz var. Bunlardan biri “Balaca Şahzadə”ni canlandıran Müslüm adında uşaqdır. Onun beş yaşı var. Bir saat 20 dəqiqə səhnədə olacaq və heç bir sözü yadından çıxartmır, özünü səhnədə böyük aktyorlar kimi aparır. İkinci obrazımız “Tülkü”nü canlandıran Dəniz adlı balacamızdır ki, o da “Balaca şahzadə”yə dostluğun nə olduğunu izah edir. Üçüncü əsas obraz isə “Qızılgül”ü oynayan Damladır. O isə lovğalığı izah edir. Tamaşanın məşqləri üç aydır davam edir, son bir ayda Əli Əlizadə ilə birgə davamlı məşqlərə start vermişik”.
“Bu festival sayca üçüncü böyük işimizdir” deyən rejissor builki festivalın daha böyük səhnədə nümayiş olunacağını bildirib:
“2014-cü ildə həyata keçirdiyimiz “Karnaval” festivalında doqquz nağılı bir “qatara” birləşdirmişdik. O vaxt hər bağça istədiyi nağılı səhnələşdirmişdi və bu, nisbətən rahat idi. İndi isə hamı bir tamaşa üçün bir araya toplanıb və daha yaxşı olması üçün çalışırlar. Məşqlərdən də gördüyüm qədərilə uşaqlar bunu bacırırlar”.
Qeyd edək ki, festivalda Education Menecment Network-ə daxil olan “Sehrli dayə”, “İndigo”, “Peter Pan”, “Baby Star” bağçalarının uşaqları iştirak edəcək.
[maxgallery id=”5524″]