16 oktyabr 2024-cü il tarixində “Bağçam” Uşaq Bağçaları Şəbəkəsi, “Indigo” Management & Consulting, “Indigo Academy” Təlim və Mentor Mərkəzinin birgə təşkilatçılığı ilə dəyirmi masa keçirildi. Dəyirmi masada müzakirə mövzusu “Məktəbəqədər təhsildə tədris vəsaitləri, mövcud durum və perspektivlər” idi. Həmçinin “Bağçam”ın yeni çap olunan tədris vəsaitlərinin təqdimatı oldu.
Dəyirmi masa zamanı “Bağçam” Uşaq Bağçaları Şəbəkəsinin təsisçiləri Samirə Dünyamalıyeva və Rasif Dünyamalıyev, şəbəkənin əməkdaşları olan mütəxəssislər və tərbiyəçi müəllimlər, ARTİ Məktəbəqədər Təhsilin Proqramları Şöbəsinin müdürü, dosent, əməkdar müəllim Laləzər Cəfərova, Elm və Təhsil Nazirliyi yanında İctimai Şuranın katibi Günay Əkbərova, ADPU Sabah mərkəzinin rəhbəri Lalə Mürsəlbəyova, ADPU nəzdində Pedaqoji kollecin Məktəbəqədər Təhsil Şöbəsinin müdürü Mətanət İsmayılova, Azərbaycan Maarifçilər Assosiasiyasının sədri Tofiq Sadıqov və digər təhsil nümayəndələri iştirak etdilər.
Tədbir Samirə Dünyamalıyevanın açılış nitqi və bağça inkişafı haqda təqdimatı ilə başladı.
Dəyirmi masa iştirakçıları məktəbəqədər təhsildəki əksikliklər, müəllimlərin qarşılaşdığı çətinliklər, tədris vəsaitlərinin çatışmazlığı barədə müzakirələr apardılar.
Görüşdə “Bağçam”ın hazırladığı metodiki vəsaitlərin qısa təqdimatı keçirildi. Vəsaitlərlə tanış olan təhsil mütəxəssisləri öz rəylərini bildirdilər.
“Bağçam”ın fəaliyyətini əks etdirən videoçarx nümayiş olundu.
Laləzar xanım çıxışında vurğuladı ki, məktəbəqədər təhsilin əhəmiyyəti artıq ön plandadır və dövlət səviyyəsində də xüsusi önəm verilir.
O həmçinin bildirdi ki, uşaqların tərbiyəsi ilə məşğul olan tərbiyəçilərin peşəkarlığı ilə yanaşı bu sahədə istifadə olunan resursların da əhəmiyyəti var. Laləzar xanım xatırlatdı ki, sonuncu dəfə dövlət səviyyəsində 2008-2009-cu illərdə 130 adda belə vəsait çap olunub. O, Bağçam-ın çap etdiyi tədris vəsaitlərini yüksək qiymətləndirdi.
Tədbirin sonunda qonaqlarla xartirə fotoları çəkildi.
