Bəzi uşaqlarda barmaq və ya əmzik vərdişlərini müşahidə edə bilərik. İlk öncə bunu qeyd edək ki, bu təbii bir haldır. Bunun əsas səbəbi bunun onlara rahatlıq və sakitlik hissi verməsidir. Hətta bəzən əmmə refleksi ana bətnində də müşahidə edilir. Buna görədir ki, uşaqlar özlərini stresli, narahat və ya yorğun hiss etdikdə barmaqlarını əmirlər. Lakin yaş artdıqca bu vərdiş atılmalıdır.
Barmaq və ya əmzik əmmə vərdişi diş və çənə əyriliyinə, dişlərin çürüməsinə, danışıqda bir çox çətinliklərin yaranmasına səbəb ola bilər.
Bir çox körpə 2-4 yaş arasında öz-özünə barmaq əmməyi tərgidir. 2 və 4 yaş aralığında uşaqlar əmzik və barmaq əmmə vərdişini yavaş-yavaş tərgitməlidir. Çünki bu dönəmdə uşaqların süd dişləri tam olaraq inkişaf edir və çənə əzələləri formalaşmağa başlayır. Əmmə vərdişini tərgitməsi üçün prosesi düzgün idarə etməli, övladınızı motivasiya etməlisiniz. Təzyiq göstərmək heç bir halda həll yolu deyil.
Barmaq əmmə vərdişini aradan qaldırmaq üçün tövsiyələr:
İlk öncə valideyn olaraq səbirli və təmkinli olmalısınız. Övladınıza təzyiq göstərərək deyil, onu həvəsləndirərək dəstək olun. Bununla bağlı ona uşaq kitabları oxuyaraq övladınızda bir fikir formalaşdıra bilərsiniz.
Yuxarıda qeyd etdiyimiz kimi, uşaqlar stresli olduqlarında və ya özlərini rahatlaşdırmaq üçün barmaq əmirlər. Bu zaman siz də övladınıza əvəzində yeni yollar təklif edə, streslə mübarizə aparması üçün fərqli seçimlər yarada bilərsiniz. İncəsənət, musiqi və ya oyunlar bunun üçün ideal vasitə ola bilər. Barmaq əmməyə vadar edən səbəbləri nəzərə alaraq ona yumşaq əşyalar da verə bilərsiniz. Məsələn, yumşaq oyuncaqlar, ədyal və s. kimi. Həmçinin uşağınız barmaq əmməyə başladığı an oyunlarla onun fikrini yayındıra bilərsiniz.
Bu prosesi övladınızla birlikdə təqvim düzəldərək izləməyə çalışın. Hər irəliləyişdə övladınızı əzizləyib həvəsləndirin.
Unutmayın ki, övladınızla bu məsələni açıq-aydın danışmalı və nə üçün bu vərdişi tərgitməli olduğunu ona izah etməlisiniz. Ən əsası övladınıza qarşı empatiya duyub nə üçün barmaq əmdiyini anlamağa çalışın. Onu qınamadan, utandırmadan və ona qəzəblənmədən bu prosesi birlikdə uğurla keçə bilərsiniz.
