“Education Management Network” və “Edu.Co” tərəfindən “Master Pre-School” Məktəbəqədər Təhsil Müəssisələri Rəhbərlərinin Hazırlıq Proqramı keçirilir.
Proqramın tərəfdaşlarına 5 illik təcrübəsi olan Uşaq Bağçası, “İndigo” Əhmədli Uşaq Bağçası, “İndigo” Nərimanov Uşaq Bağçası, “Baby Star” Uşaq Bağçası, “Peter Pan” Uşaq Bağçası və “Yuvam” Uşaq Bağçası daxildir.
Bu barədə Bagcam.az-a layihənin rəhbəri Sevda Babanlı müsahibə verib. O, bildirib ki, proqram çərçivəsindəki təlimlər praktiki formada aparılır:
“Master Pre-School” Proqramı təhsil müəssisələri menecerlərini hazırlamaq üçün təşkil edilir. Proqram müddətində iştirakçılar 5 istiqamət üzrə 5 təlim və 10 seminarda iştirak edəcək, 5 uşaq bağçasında 5 menecerin yanında 100 saatlıq təcrübəyə cəlb olunacaq və ən yaxşı nəticə göstərən 2 iştirakçı ilə 1 illik əmək müqaviləsi imzalanacaq.
Proqram müddətində təlim istiqamətlərinə – İnsan Resurslarının İdarə Edilməsi: İşçi seçimi proseduru, işçilərin sənədləşməsi prosesi, işçilərin motivasiya sistemləri və işçilərin inkişaf fəaliyyətləri; Marketinq Menecment: Müştərilərin davranışı, bazar seqmentləşdirilməsi, qiymətqoyma strategiyaları, marketinq kommunikasiyaları, marketinq planlaması; İctimaiyyətlə Əlaqələrin İdarə Olunması: PR-ın istiqamətləri, PR alət və vasitələri, Media ilə əlaqələr, Qara PR, Böhran idarəçiliyi, PR analiz, PR plan, PR strategiyanın qurulması; Maliyyənin İdarə Olunması: Maliyyə Hesabatlarının Məzmunu və Məqsədləri, Mühasibat Uçotunun Əsasları, İkili Qeydiyyat Sisteminin Tətbiq Edilməsi və Mühasibat Uçotu Sistemi, Maliyyə Əməliyyatlarının və Hadisələrinin Qeydiyyatı, Yoxlama Balansının Tərtib Edilməsi, Əsas Maliyyə Hesabatlarının Tərtib Edilməsi; Məktəbəqədər Tədris Proqramı – Kurrikulumu: Məktəbəqədər təhsilin əhəmiyyəti və rolu, təlimin məqsəd və vəzifələri, ümumi inkişaf və təlim nəticələri, inkişaf standartlar və sahələri, tədrisdə inteqrasiya və onun əhəmiyyəti, məzmun standartı, təlim məqsədinin müəyyənləşdirilməsi, təlim strategiyaları, təlimin təşkilinə verilən əsas tələblər, təəlim zamanı iş formaları, fəal təlim üsulları, təlim üsulu seçilən zaman nəzərə alınan meyarlar, fəal məşğələnin mərhələləri, motivasiyanın yaradılması yolları, təlim zamanı planlaşdırmanın növləri, cari planlaşdırma, təlim nəticələrinin qiymətləndirməsinin növləri, qiymətləndirmə zamanı istifadə olunan metodlar aiddir.
Seminarlar isə – Konfliktlərin idarə edilməsi və ünsiyyət bacarıqları; Məktəbəqədər təhsil və uşaqla bağlı qanunvericilik; Stresin idarə edilməsi; Liderlik və komanda işinin qurulması; Uşaq inkişafı sahələri, xüsusiyyətləri, qiymətləndirilməsi və hesabatlılığı; Natiqlik və özünü təqdim etmə bacarığı; Müştəri əlaqələrinin qurulması və idarə edilməsi; Sosial Media vasitələrinin idarə edilməsi; Öyrədici mühit və onun yaradılması, oyun və oyun təşkili formaları; Təchizat işinin qurulması və idarə edilməsi; Zamanın idarəsi istiqamətində keçirilib”.
Sevda Babanlı “Master Pre-School” Proqramının təlimçiləri barədə də məlumat verib. Bildirib ki, layihəyə öz ixtisasının peşəkarları cəlb edilib:
“Proqrama təlimçi qismində Şəmsi Bayramzadə – marketinq üzrə mütəxəssis; Rasif Dünyamalı – idarəetmə üzrə mütəxəssis; Azər Nəzərov – ictimaiyyətlə əlaqələr üzrə mütəxəssis; Orxan Rzayev – sosial media marketinqi üzrə mütəxəssis; Sevinc Səmədzadə – konflikt menecment üzrə mütəxəssis; Qasımlı Nərgiz – insan resursları idarəedilməsi üzrə mütəxəssis; Vəfa Şirinova – psixiatr; Tofiq Sadıxov – şəxsi İnkişaf üzrə Təlimçi; Fəxri Ağayev – biznes təlimçi; Qasımlı Sübhan – maliyyə idarəedilməsi üzrə mütəxəssis; Natavan Quliyeva – kurrikulum üzrə mütəxəssis; Xalidə Rzayeva – təlim üzrə mütəxəssis; Cavid İmamoğlu – şəxsi inkişaf üzrə təlimçi dəvət olunub. “Master Pre-School” Proqramı çərçivəsində keçirilən təlimlərdə pedaqoji təhsilli, bu sahə üzrə fəaliyyətini davam etdirmək istəyən 18 nəfər iştirak edir. Qeyd edim ki, ümumi treninqlər zamanı maraqlı testlər və oyunlar keçirilir”.
Qeyd edək ki, Proqram Education Management Netvvork və Edu.Co Şirkəti tərəfindən həyata keçirilir. Hər iki qurum məktəbəqədər təhsil sahəsində biznes layihələrin işlənib hazırlanması, həyata keçirilməsi və idarəedilməsi sahəsində 5 ildən artıq təcrübəyə malikdir. Hər iki qurumun biznes portfelinə 10 özəl uşaq bağçasının və 2 uşaq inkişafı mərkəzinin layihələndirilməsi və qurulması, hazırda isə 6 özəl uşaq bağçasının idarəedilməsi və 1 özəl uşaq bağçasına məsləhət xidməti göstərilməsi daxildir.